Nimin leh vawiin khan Lawngtlai DC Conference Hall-ah District Bawrhsap, Dr. Arun T hovin National Bank for Agriculture and Rural Development (NABARD) hnathawh chungchang sawi ho a ni a, Lawngtlaia Bank leh sorkar department hrang hrang aiawhte an tel. Bawrhsap chuan NABARD puihnain Mizoram Rural Bank, Lawngtlai Branch tan mobile ATM van neih theih ni se a duh thu sawiin, hei hi bank awm lohna khuate tan a tangkai hle dawn niin a sawi a. Lawngtlaiah Cooperative Society din a nih ve theih nan tan lak tul a tih thu a sawi bawk. NABARD hnuaiah hian Rural Infrastructure Development Fund atangin Lawngtlai Veterinary Hospital leh Solar Water Pumping Scheme project siam tum a ni a. Sikul building sak that hna pawh RIDF atang hian thawh tum a ni bawk a. Kum thar, 2018-19-a Lawngtlai leh Siaha District chhunga NABARD hnathawh dan tur chu Bawrhsap hian a tlangzarh nghal bawk a ni.
