LADC-a Congress Member 4-in congress chhuahsan-a MNF member 8 leh Independent member 1 te nen United Legislature Party din-a MNF kaihhruai sorkar din an tum mek laiin Pu T Zakunga hian LADC a Congress sorkar tlu mai tur anga sawi chu thu dik lo a ni a ti a, mipuite thlaphanglo turin a chah a ni.
Pu T.Zakunga hian Congress Legislature Party chu Congress MDC pali leh Independent MDC pakhat in an thlawpna hnukdawk mahse Congress in Elected MDC 12 ala neih bakah Nominated Member pathum nen Member 15 an la neih vangin Member 28 awmna LADC ah Congress chuan Member a la ngah zawk a ni a ti a, Nominated Member ten Sorkar buknaah vote an nei thei lo nia sawi chu thu belhchian dawl lo niin a sawi a, LADC Constitution Conduct of Business Rules ah Nominated Member ten Vote en neih theih leh neih theih loh thu inziak a awm lo a ni a ti.
Kum 2007 ah Mara Autonomous District Council ah Gauhati High Court in Nominated Member ten Vote an nei thei lovang tiin thutlukna siam mahse, kum 2013 ah Gauhati High Court vekin he thutlukna lo awm tawh sa hi hnawlin Karbi Anglong Sorkar-ah Nominated Member ten Vote an nei thei ang tiin thutlukna a siam a, Supreme Court thutlukna pawh hriattur a awm a ni a ti a, heivang hian LADC a, a kaihhruai Sorkar tlu mai tur anga sawi chu thu belhchiandawl lo a ni a ti.
Congress Legislature Party chhuahsantu congress member pali leh independent member pakhat te chuan LADC dan dinglai an bawhchhiat vangin, Member an nihna hlihsak turin Governor hnenah Ningani khan ngenna a thlen tih Pu T Zakhunga hian a sawi a, Gauhati High Court-ah pawh thubuai thehluh a tum thu a sawi.
CEM, Pu T.Zakunga hian State-ah MNF Party in thuneihna a chan a piangin District Council-ah an Sorkar theih nan mipui zahna nei lovin hma an la \hin niin a sawi a, invau leh inrahbehna a thleng \hin nia sawiin, hei hi mipui zah lohna a ni a ti.
Member 25 awmna Lai Autonomous District Council-a sorkar lai, congress legislature party-a congress member 4 leh independent pakhat te chuan sorkar an thlawpna hi Nilaini khan hnukdawkin, MNF Member 8 te nen United Legislature Party an din tih an puang a, hei vang hian LADC-ah hian Pu T. Zakunga kaihhruai Congress Legislature Party chuan thlawptu Elected Member 12 bakah nominated member pathum a nei ta a, a lehlamah United Legislature Party hian Member 13 an nei ta thung a, nominated member ten sorkar buknaah vote an thlak thei em tih chu congress sorkar dinglai tluk leh tluk loh tur hriltu a ni ta tihna a ni.
