LADC Budget Session, nimina neihah, Sorkar dinglai rintawk lohna Motion hi putluh a nih vangin, session \annia, CEM in Budget a pharh , sawiho tura ruahman lawk chu \hulh a ni a, Motion lut hi chawhnu dar 2 a\anga sawiho \an a ni a, Motion buk a nih dawnah ruat seat luahtu, nominated member ten vote an neih theih leh theih loh tur chungchangah ngaihdan a inang lo a, member te an inhnial buai nasat avangin police te pawh an inrawlh hial a, hetiang boruak karah hian Chairman Pu V.Zirasanga chuan Session hi a titawp lailawk a, August 9, 2019 ah chhunzawm a ni ang.
Pu Manghmunga Chinzah, Pu C.Lalsawmzuala leh Pu Lallawmsanga Apetow ten Sorkar dinglai chu inawpna leh pawisa hmandan ah rintlak loha ngaiin, sorkar rintawk lohna motion hi an pulut a, LADC-a sorkara buaina neuh neuh tunhnaia thlengah High Court in thil awmdan ngaia kalpui rih tura thupek a tih chhuah avangin rorellai pawl chuan motion putluh hi Court zah lohna ni an ti ve thung a ni.
LADC-a sorkar lai, Congress legislature party chu MDC 4 leh Independent Member pakhatin tunhnai khan an chhuahsan a, MNF, MDC pariat te nen United Legislature Party dinin sorkarna siam an tum a, Elected Member 25 awmna LADC ah Congress Legislature Party hian Elected Member 12 chauh thlawptu a nei ta a, United Legislature Party lam hian Elected Member 13 an nei ta thung a ni. Hetianga Congress MDC pali leh independent member pakhatin Congress sorkar an thlawpna an hnuhdawh avangin sorkarlai party hi court ah an zualko a, Court hian thutlukna siam anih hma chuan sorkar kallai chu a ngaia kal rih turin a ti a, High Court-ah hian thu a la inchiah mek a ni.
