Kumin Assembly inthlanah mipuiin Congress an hnawl dawn niin MNF President Pu Zoramthanga’n a sawi. Lunglei MNF Sub-Headquarters Conference vawiina Saikuti Hall-a neihah thu sawiin Pu Zoramthanga chuan Congress chu rampumah hnawlin an awm mek niin a sawi a, Mizoramah pawh Kohhran, NGO leh Zirlai pawlte pawhin an thlahlel tawh lo nia sawiin paihthlakin an awm ngei dawn niin a sawi. Pu Zoramthanga chuan Congress sorkarin Kohhran leh NGO duh lo chungin zu a zawrh luih zel avangin mipuiin nasa taka tuarin hmeithai an tam phah hle bawk niin a sawi a, MNF sorkar hun tur Mizoram mipui chauh ni lo Burma, Bangladesh pawhin an nghakhlel hle tih sawiin MNF in thuneihna a chan hunah Economic leh Political-ah Mizoram in hmun pawimawh tak a chang dawn niin a sawi a ni. Pu Zoramthanga chuan Assembly inthlanah MNF in thuneihna a chan chuan, SEDP hmangin Economic independent na tur an kalpui dawn niin a sawi a, chaw, buh leh bal thlai leh hriakah mipuite an intodelh ang a chhungtin sum lakluh nasa takin a pung dawn niin a sawi.
Inkhawm hi Lunglei MNF Sub Headquaters President Pu Lawmawma Tochhawng in a kaihruai a, MNF Vice President Dr R Lalthangliana’n thu a sawi bawk.
