Muzaffarpur naupang enkawlna hmuna thil thleng hi CBI te chuan an chhui zo tawh tih an sawi a, nikum lam khan CBI hian ruhro \henkhat an hai chhuah avangin he naupang enkawlna hmun enkawltu politics-a thil ti thei tak Brajesh Thakur leh a thurualpuite hian hmeichhe naupang 11 te an that a ni thei tih Supreme Court an hrilh a, hetihlai hian CBI chuan ruhro hmuh chhuahte hi mipa leh hmeichhe ruhro anih thu leh naupang ruhro hmuh chhuah a awm loh thu an sawi leh ta thung a ni.
CBI tana ding Attorney General KK Venugopal chuan hmeichhe naupang, a tira thah nia hriatte hi chhui chian anih hnuah an vaiin an la dam vek tih hriat chhuah a ni a ti a, CBI te hian Bihar-a naupang enkawlna hmun 17 an chhui chiang tih sawiin, 13-ah te an thil chhui dan kimchang an court ah an thehlut tawh tih a sawi. CBI hian an thil chhui dan hi Supreme Court ah an thehlut a ni.
Hetihlai hian Muzaffarpur naupang enkawlna hmunah hian hmeichhe naupangte chu zahmawh rawngkai hlaah lam luihtir an nih thu leh chiu ruih an nih hnua pawngsual an nih thu te CBI te hian an chargesheet thehluhah hian an tarlang a, a mawhphurtu bera puh chu Brajesh Thakur a ni.
CBI hian Bihar sorkar chu naupangte enkawlna hmun vilzuina kawnga mawhphurtu sorkar hnathawkte laka a \ul anga hmala turin a ti a ni.
