Kum 6 mi naupang pawngsuala thattu, Pakistan Court-in tihhlum turin ti

Naupang kum 6 mi, rawng taka pawngsuala that zuitu, kum 24 mi Imran Ali chu Pakistan Court in thi turin a chungthu a rel. Imran Ali hi thil chi 4 ah thi tura a chungthu rel a ni a, chungte chu naupang ruk thubuai, pawngsual thubuai, tualthah thubuai leh firfiaka chetna thubuaiah te a ni. Heng pawikhawihna tinah hian tih hlum tura a chungthu rel vek a ni a, hurherhna thubuaiah dam chhung tang tura a chungthu rel a nih bakah cheng maktaduai 3 leh nuai 2 chawi tura tih a ni bawk. Hmeichhe naupang Zainab Ansari ruang hi Lahore khawpui chhim lam khaw pakhat Kasur a bawlhhlawh paihna hmunah January ni 9 khan chhar a ni a, he tualthahna thleng avang hian Pakistan ram pumah buaina a chhuak zui a, Police te laka lungawi lo mipui thinrim leh Police te an intawngna ah mi 2 an thih phah a ni. Vawiina Court in tualthattu Imran Ali hremna a puan lai hian a mi thah naupang pa pawh Court ah hian a awm ve a ni. Ali hi tualthah thubuaiah pawh a inhnamhnawih ngei niin Police te chuan an sawi.