Kum 2018 a\anga thawh \an, nizung chakna hmanga power Megawatt 2 siam chhuak thei tur Solar Power Plant, Tlungvel ram Khawkum hmuna ZEDA ten an siam mek chu zawhfel a nih dawn tawhah a khaw neituten an chhawr dawn lo nia hriain hna thawh kallai an ti tawp.

Solar Power Plant a\anga power siam chhuah te hi 11kv line-ah thlun zawmin Thingsulthliah leh Chhingchhip sub-station ah te pek luh tur niin Tlungvel All NGO’s Committee chuan an sawi a, a bunna tura an khaw ram \ha lai ber an pek chu a khaw neitu Tlungvel in an chhawr ve ngei phutin hnathawktute chu an chawlhtir a ni.

Kum 2018 December ni 21-a hnathawh bul\anna lung phum ni-ah pawh Dept. hotu ten power siamchhuah hi Tlungvel tana pek a nih tur thu an sawi tih Tlungvel-a All NGO Committee hian an sawi a, hna zawh tawh dawn thleng pawha hemi kawnga hmalakna a awm loh vangin an lungawina anga hmalakna awm hma chu hna thawh chhunzawm an remti tawh lo tih an sawi.

Tlungvel All NGO’s hruaitute chuan Tlungvel in an chhawr ngei theih na tur hian VC, NGO’s leh party aiawhten \um 5 thuneitute an dawr tawh tih an sawi a, March thla thlenga an duh ang hmalakna a awm lo anih chuan solar plant siam mek chu hmun dangah sorkarin sawn chhuak mai se an duh tih an sawi.