Kum 2017 September ni 5-a a chenna in tuala kahhlum tak, journalist leh activist ni bawk Gauri Lankesh-i thahna chhui chiangtu, Special Investigation Team, SIT in zirtawpni khan Bengaluru-a Principal Civil and Sessions Court-ah chargesheet a thehlut.

Chargesheet-ah hian Lankesh hi mimal thil vanga beih a nih loh thu leh Hindu kal firfiak pawl Sanatan Sanstha mi leh sa te thah a ni tih tarlan a ni a, tualthattu te leh Lankesh-i te inkarah hian mimal inhuatna a awm loh thu leh Lankesh-i rilru sukthlek an pawm loh vang chauha that an nih thu tarlan a ni bawk a, SIT hian thubuai hi chhui chhunzawm zel a dil nghal bawk a ni. Puan tawh angin Lankesh hi Hindutva dodaltu langsar tak a ni a, thah a nih hnu hian Karnataka sorkar chuan SIT hi a din a, he thubuai-ah hian mi 18 chu inhnamhnawiha puh an ni tawh a, an zingah hian silai hmetpuaktu leh a ruahmanna siamtute pawh an tel a ni.