Excise and Narcotics Department chhinchhiah danin, kuminah hian Mizoramah ruihhlo avangin mi 47 an thi tawh a, ruihhlo kaihhnawihah mi 295 an man tawh a, chung zinga 251 chu ND&PS Act tlawhchhanin thubuai an siamsak. Hemi chungchang hi vawiin khan Excise Commissioner, Pu Ngurchungnunga Sailo leh a thawhpuiten thuthar lakhawmtute an hrilh a, tun hnaiah an Department-in ruihhlo a man khawm sa, a nihna tur hmun ni lova riral awm thin nia sawi chu thu belhchian dawl lo nia sawiin, ruihhlo an man reng reng, pawngpaw kawl ngawt lovin, Supreme Court-in inkaihhruaina dan a siam zulzuiin a dahna tur hmun bika siamah dah thin a nih thu an sawi. Ruihhlo man sa hi duh hun huna lak chhuah mai theih a ni lo a, a tiral tur pawhin Disposal Committee remtihna a ngai niin Pu Ngurchungnunga Sailo chuan a sawi a, Court-in thubuai a chin fel tawh chu halral tura buatsaih thin a ni tih sawiin, thil chinfel ngai awmte tihfel a nih hnuah Magistrate-ten an endik a, chumi hnuah a halna tur hmunah an hal chauh thin niin a sawi. Ruihhlo an halte chu a tak ngei a ni tih sawiin Excise Commissioner chuan, nikuma Bawngkawn Brigade Field-a an hal phei kha chuan a hmunah a enfiahna khawl an chhawp a, a duh apiang tan en fiah theihna hun an hawng a sawi bawk. Zawhna chhangin Excise Commissioner chuan, an Department-in ruihhlo a man chu tun hmain a lo chingpen thin a nih pawhin, tun hnuah chuan a riral a hriat loh thu leh ruihhlo man tawh enkawl zui danah an Department hnathawkte chu a rin tawk thu a sawi bawk.
Excise and Narcotics Department chhinchhiah dan chuan ruihhlo hi kum 2006 atang khan an hal ral tan a, an hal ral hnuhnun ber, kumin March ni 17 khan Heroin Gram 121, Pseudoephedrine mum 2,30,000 leh Ganja Kg. 10 an halral a. Kuminah hian Heroin Kg. 3 leh Gram 453, Ganja Kg. 332 leh Gram 548 leh Methamphetamine mum 13,400 an man tawh a ni.
