Dr. Kafeel Ahmad Khan hi naupang doctor a ni a, kum 2017, August thla khan BRD Medical College-ah a hna hi zawmin, a thawh a\anga ni hnih hnuah naupang ward-ah oxygen supply a khaihlak a, hei vang hian naupang 60 chuang an thi nia sawi a ni a, Dr. Kafeel chu mawhphurtua puhin man a ni a, lung inah khung a ni.
Gorakhpur Hospital-a naupang tam tak an thih thu a hriatin Chief Minister, Yogi Adityanath chuan damdawi In chu a tlawh a, Dr. Kafeel chu a suspend nghal a ni. Uttar Pradesh sorkar chuan thil awmdan a hriat hnuah pawh hma la nghal lovah Dr. Kafeel chu a puh a, encephalitis veite awmna ward enkawl tura ruat a nih angin he ward-in harsatna a tawh chu a hre tur a ni a ti bawk.
Gorakhpur Hospital-ah hian kumtin encephalitis natna vei naupang sang chuang admit an ni \hin a ni.
He ward a\ang naupang an thih \euh vang hian mi 9 te lakah FIR thehluh a ni a, an zingah Dr. Kafeel leh medical college principal hluite pawh telin kum 2017 September thla khan Dr. Kafeel chu manin, a tan a\anga thla 8 hnu, kum 2018 April thla khan Allahabad High Court chuan Dr. Kafeel puhnaah finfiahna mumal a awm loh vangin bail-in a chhuah lailawk tir a ni.
Kumin April thla khan Dr. Kafeel-a thubuai bawhzuitu IAS Officer, Himanshu Kumar chuan state sorkarah a report chu thehlutin, sorkar chuan Dr. Kafeel-a thiam lohna report-ah a hmuh loh thu a sawi a ni.
