Kum 2013 Assembly inthlanpui neih tuma Serchhip bial-a Congress Candidate, Pu Lal Thanhawla’n Affidavit dik lo a thehlut nia sawi chungchangah vawiin khan Pu Lalhriatrenga Chhangte-in Serchhip District Court-ah FIR a thehlut. Indian Bureau of Mines-a Deputy Controller of Mines hna chelh lai, Pu Lalhriatrenga Chhangte hian Pu Lal Thanhawla’n Affidavit dik lo a thehlut nia sawi chungchangah hian nikum November ni 13 khan Election Commission of India-ah hekna a lo thlen tawh a. Pu Lal Thanhawla hian kum 2013 Assembly inthlanpui neih dawn khan Affidavit a siamah Kolkata-a a In hmun neih a ziak tel lo nia sawiin, hemi chungchang hi Election Commission of India hnena a thlen tumin complain siam hun a tawp tawh thu leh Court lama kal mai tura thurawn an lo pek angin, FIR hi a thehlut ta niin a sawi. Pu Lal Thanhawla’n Affidavit-a Kolkata-a a inhmun a ziahlan loh bakah hian Assembly inthlanpui neih tawh thenkhata a Affidavit siamah a kum zat a inang lo nuai niin a sawi bawk. Vawiina Pu Lalhriatrenga Chhangte-in Serchhip District Court-ah FIR a thehluhnaah hian Sr. Advocate, Pu Lalramzauva hovin Advocate pali-in an tawiawm a ni. Zawhna chhangin Pu Lalhriatrenga Chhangte chuan, Social Media lama Affidavit dik lo chungchang a lo sawi tawh thin leh thubuai thehlut tura hmalak a tum thu a lo sawi tawh thin angin he thubuai hi a thehluh tak chu a sawi a. Thubuai thehluh bak chu a tan tih theih a nih tawh loh thu leh thu kal zel dan tur chu Court thuneihna a nih tawh thu a sawi a ni.
