Nirbhaya thubuai tia sawiah hian pawngsuala that zuitu mi 4 te chu court in khai hlum turin an chung thu a lo rel tawh a, Supreme court-a ngenna an thehluh leh hi judge panga awmna bench, Justice NV Ramana kaihhruaiin ngaihtuahin a hnawl a, President hnena zahngaihna dil chiah tih theih an nei ta a. Central sorkar chuan President hnenah hian zahngaihna lantir lo turin thurawn a lo pe tawh bawk a ni.
Delhi Court chuan hapta liamta khan heng mi pali, Mukesh Singh, Pawan Gupta, Vinay Sharma leh Akshay Kumar Singh te hi kum 23 mi damdawi lam zirlai pawngsuala an thah zui avang khan tun thla ni 22-a khai hlum turin an chungthu a rel a ni.
Pawngsualtu zinga a meizang hlaptu ber Ram Singh chu March 2013 khan a tanna Jail ah a lo inawkhlum tawh a, an zinga tel ve pakhat chu kum 18 a la tlin loh avangin nun siam\hatna hmunah kum 3 awm tura thawn a ni thung.
Kum 2012 December ni 16 khan Nirbhaya tia hriat zui tak, nula leh a thiante hi an in lam an pan laiin bus ah thlem luh an ni a, thir tlawn leh hmanraw dang hmangte-a nghaisa in an pawngsual rawn a, a kalpui, a \hianpa pawh na taka kutthlak a ni bawk. Nirbhaya hi ni 13 chhung enkawl a nih hnuah a hliam tuar lovin Singapore damdawi in pakhatah a thi a ni.
He pawikhawihna rapthlak tak thleng hian India ram pum bakah khawvel a nghawr chhuak a, mi tam takin rorelna dik phutin lungawi lohna an lantir a, dan dinglaite pawh siam\hat zui a ni. Nirbhaya-i nu chuan kum 7 chhung rorelna dik an hmuh theihna turin an lo bei tawh tih a sawi a, January ni 22-a a fanu pawngsualtute khaihlum an nih hun chu an tan ni pawimawh tak a ni dawn tih a sawi.
