Aizawl District Child Protection Unit leh CARE – World Vision India \angkawpin Aizawl District huam chhung Primary leh Middle School-a naupang venghimna lam khawihtu zirtirtute tana hemi lam kaihhnawih zir hona vawiina Aizawl Chanmari YMA Hall-a an buatsah he thu hi tarlan a ni a. He zir hona hawngtu Social Welfare Director, Pi Vanlalpianpuii chuan, naupang kumtling lo pawikhawih thubuai ziahlih zingah hian rukruk, pawngsual leh khuaikhem thubuai, MLTP Act bawhchhiatna, ruihhlo ngai leh tualthah thubuai engemaw zat a awm tih sawii, hei hian sualna chi hrang hrang lakah naupangte ven uluk an ngai hle tih a tichiang hle a ni, a ti a. Naupangte chu ram nghahfak, nakin lawka ram hruaitu la ni mai tur an nih avangin an mahni humhim a, sualna chi hrang hrang laka an peng bo tur ven chu mi tin mawhphurhna a ni tih hriat thar a ngai a ni, a ti.
A hawnna inkhawm Aizawl District Child Protection Officer, Pu James Lalthangmawia kaihhruaiah hian Aizawl District Education Officer, Pu Zohmingthanga pawhin zirtirtute chu naupangte belchiangtu an nih avangin an rilru sukthlek leh puthmang hre tura zirchiangin naupangte \hiana siam thiam tur leh Schhol chu an tan hrehawm lova nuam ti taka an awm theihna hmuna siam turin a chah a ni.
He zir honaah hian World Vision, India Campaign Officer, Dr. Anangadev Singh, LifCode Boys Home Superintendent, Dr. Samuel Lalzarmawia, Clinical Pyschologist, Dr. Lalengmawii, Aizawl DPCU-a Protection Officer, Pi Lalrempuii Fanai leh Pi C. Lalremruati bakah Legal cum Probation Officer, Pu Aldrine Zorinthara Ralte-in kawng hrang hranga naupang humhim dan leh an dikna chanvo humhalh tura hmalak dan tur an zirtir a. Report a\anga a lan danin, JJB-in thubuai a ziahluhte chu rukruk thubuai 980, pawngsual leh mi khuaikhem thubuai 184, MLTP act bawhchhia 125, ruihhlo ngai 90 leh tualthah thubuai 19 a ni a. CWC-in thubuai a ziahluhte chu nu leh pa fa enkawl tlak lova puan 1,117, khuaikhem tuar 794, nu leh pain an ngaihthah naupang 749, chhungkaw harsatna avanga naupang enkawl thei lo 383, naupang hleilenna tuar 436 leh naupang ruihhlo ngai thubuai 185 a ni.
