West Phailenga KTP General Conference vawi 57-na Ningani atanga neih chu nizan khan a tiak ta. Conference tawp zan hian Central KTP Leader kalchhuak, Rev. Zothansanga’n Pathian thuchah a sawi a, Conference hmangtute chu Krista duhzawng nun chhuahpui turin a fuih a ni. Conference-a Speaker, Rev. Vanlalzuata chuan Conference thupui, “Isua chhinchhiahna put” tih hmangin Pathian thuchah a sawi thin a ni. Conference tawp zan, nizan khan Synod Moderator, Rev. F. Lalrinnunga chuan kum 2018-2020 thlenga Central KTP hruaitu tura thlan mi 20-te mipuite a hmelhriat tir a ni. Central KTP hruaitu thar tur te hi Leader atan Synod ruat, Rev. Dr. K. Lallawmzuala, Secretary atan Synod ruat bawk, Pu Rochungnunga, Worship Deptt. Coordinator ni lai te, Assistant Leader atan Upa Rosangliana, Electric Veng Bial, Assistant Secy. T/Upa Ricky Lalrammawia Ralte, Bawngkawn Bethel Bial, Treasurer, Dr. Lalrotluanga, Zonuam Bial leh Finance Secy. atan Pu Lalmuanawma, Kulikawn Bial te an ni. Committee Member atana thlante chu Pu Lalruatfela, Bawngkawn Bial, T/Upa Lalsiammawia Pachuau, Bethlehem Venglai Bial, Pu David Lalhmachhuana, Chaltlang Bial, Pu K. Lalengzama, Chanmari Bial, Pu PC Lalrinsanga, Dawrpui Bial, Pu R.Lalbiakmawia, Dawrpui Vengthar Bial, Upa K. Lalnuntluanga, Hlimen Bial, T/Upa Lalrinmawia Ralte, Khatla Bial, Pu Lalrinchhana Ralte, Mission Veng Bial, Pu Malsawmtluanga, Mission Vengthlang Bial, K. Lalchhanhima, Ramhlun North Bial, Pu Rorelkima, Ramhlun Bial, C Malsawmtluanga, Republic Bial leh Benjamin Lalnunpuia, Vaivakawn Bial te an ni. Synod Choir Director atan Dr. David C. Vanlalfakawma, Zemabawk Bial, Kristian Thalai Chanchinbu Editor atan Robert Lalduhzuala, Ramthar Bial te ruat an ni bawk. He Conference-ah hian kum 2022-a KTP General Conference thleng turin Central KTP Committee chuan Kolasib a ruat tih puan a ni a, General Conference vawi 58-na kum 2020-a neih tur chu Serchhipah nghah a ni dawn tih Conference hmasaah puan a lo ni tawh bawk a ni. He Conference-a rorel palaiten thu tlukna an siam pawimawh zual zingah chuan kum 2018-2019 chhunga Central KTP budget atan Rs.48,20,000/- pass te, Falkland Venga Youth Recreation Centre sak chhunzawm nan Aizawl khawpuia member ten Rs.50/- theuh, District Capital-a member ten Rs.30/- theuh leh hmun dang zawnga member ten Rs.20/- theuh thawh se tih te, kumin chhunga KTP zan khat inkhawm thawhlawm YRC sak nan pek ni se tih te, zan khat inkhawm thawhlawm dang Synod Hospital Charity Fund atan pek ni se tih te, kumina Mizoram Assembly inthlanna neih tur atan te, sual thupha chawi nan te, ruihhlo ngai leh member hla te hnuh hnaih nan Mizoram pum huapa tawngtai rual ni se tih te a tel a, kumpuan thupui atan “Kristian nun takna” tih thlan a ni bawk. KTP General Conference-ah hian Information & Publicity Sub Committee chhinchhiah danin palai riak lut 16,752 leh lehlanga chhim 1,052 an awm a, lirthei an hman zawng zawng chu 2,252 a tling a, Helicopter 1 pawh hman a ni. Tun dinhmunah Mizoram chhunga bial 192 leh Mizoram pawna bial 13-ah KTP Member 1,47,664 an awm a, heng zinga 92,220 te chu mipa an ni a, 55,445 te chu hmeichhia an ni. KTP General Conference neihna Pandal hi naktukah khawtlang huapa hnatlang kohin thiah a ni ang a, Organizing Committee atanga ZONET thudawn danin vawiin khan Light & Sound Committee, Decoration Committee te chuan an thil sut ngai leh thiah ngaite an thiat a ni.
