KTP General Conference vawi 57-na Pathianni thleng awh tur chu zanin hian West Phailenga Pandal-ah tan a ni. Zanin dar 7-a Palai lawm inkhawm chu Central KTP Leader, Rev. Zothansanga kaihhruaia neih a ni a, hetah hian Synod Executive Secretary, KTP enkawltu, Rev. B. Sangthanga’n Kumpuan hawngin Kumpuan film a tlangzarh ang a, Synod Choir Music Video pawh Senior Secretary, Upa R. Dengzikpuia’n a tlangzarh bawk ang. Inkhawmah hian Rev. F. Lalrinnunga’n Pathian thuchah a sawi ang a, Mizoram Synod Choir, Nisapui, Venghnuai, Teikhang leh Sairang Dinthar Bial Zaipawlte an zai dawn a ni. He Conference-a tel tur hian vawiin tlai thleng khan Palai thahnem tak an thleng tawh a, an la thlen belh zel a ni. Naktukah chuan chawhma lamah rawngbawlna report leh report dangte ngaihthlak a ni ang a, Zaipawlte an zai ang a, chawhnu lamah Variety Programme neih a ni ang. Kum 2018 atanga 2020 thlenga Central KTP hruaitu thlanna chu tun thla ni 3, inrinni-ah neih a ni ang. KTP General Conference neih mek hi ZONET chuan Rinna Channel-ah live-in a pe chhuak a ni.
