KTP General Conference neihna tur pandal Pathian hnenah hlan dawn

KTP General Conference March ni 1 atanga ni 4 thleng neihna tur Pandal West Phaileng khelmuala sak chu zanin hian Pathian hnenah hlan a ni dawn. Hlanna inkhawm hi zanin dar 7:30-ah tan a ni ang a, bialtu Pastor, RK Lalnunmawia’n a kaihruai ang a, hetah hian a huhova tawngtaiin Pandal hi Pathian hnenah hlan a ni ang a, bial zaipawl pawh an zai dawn a ni. Conference Programme ruahman hi Central KTP Leader, Rev. Zothansanga kaihhruaia tun thla ni 15-a Central KTP Committee thukhawm chuan thlirletin thil tihfel ngaite an tifel tawh a, hemi bakah hian kum 2018-2019 chhung atana bial budget ruahman pawh thlirlet a ni a, Conference chhunga ngaihtuah tura bial 69 atanga thu thehluh 110 a awm a, chung zingah chuan Youth Recreation Centre din chungchanga rawtna 11 a tel a ni. Hemi bakah hian ruihhlo leh a kaihhnawih chungchang te, kum puan atana rawtna 19, thupui zir tur atana rawtna 11 leh rawtna dang engemawzat a awm a, heng rawtna te hi Conference-a chhawpchhuah tura thliar fel a ni tawh a ni. Hemi bakah hian kum 2018 atanga kum 2020 thlenga Central KTP Hruaitu thlanna neih tura khawpui bial 46 atanga rawtna siamte thliar fel a ni tawh bawk.
He Conference thupui atan hian “Krista chhinchhiahna put” tih thlan a ni a, he thupui tlawh chhan hian Rev. Vanlalzuata’n Pathian thuchah a sawi thin ang. KTP General Conference Organizing Committee chuan mi a tam thei ang ber he Conference-a tel turin a sawm a, a thleng tura an inbuatsaihna pawh an theih ang tawka tha niin a sawi bawk a ni.