Traffic hotute hnen a\anga Zonet thudawn danin, No Vehicle Zone hi chawhma dar 10 a\anga tlai dar 4 thleng neih tur a ni a. Hetih chhung hian Chanmari leh Zodin Square inkarah Thirsakawr leh Nawrlirh tiamin lirthei eng chi mah tlan luh phal a ni dawn lova. Hei hian Hospital Emergency duty bakah natna avanga Damdawi in pante erawh a huam lo ang. No Vehicle Zone puan a nih chhung hian Aizawl khawpui chhung chhim leh hmar inkalpawhna kawngpui, Main Road khar a ni dawn a, Aizawl Civil Hospital a\anga chhuak, chhim lam pan turte chu Bazar Bungkawnah tlan tlang theih a ni ang a; Dawrpui Taxi Stand chu Baja tlang hnuai leh AR Quarter Guard hnuaiah sawn a ni ang. Aizawl chhim lam a\anga hmar lam pan turte chu tlak lamah Temple Square a\angin Vaivakawn lamah kalin, Hunthar veng lam an pan ang a, LMV leh a hnuailam chu Company peng lamah kalin Bawngkawnah a chhuah choh theih dawn a, Chanmari West lamah kalin, Chanmari kawnah an chhuak chho thei dawn a ni. Chhuah lamah chuan Sikulpuikawn a\angin Republic veng lamah kalin, Bethlehem a\angin Chhinga veng lamah a kal theih dawn a. Teasury Square a\angin Republic veng lamah kual lutin, Electric veng lamah a chhuah theih dawn bawk.
Hmar lam a\anga chhim lam pan turte chu tlak lamah – Chanmari Biak In bul a\angin Chanmari west lamah chhukin Vaivakawn lamah a kal theih dawn a. Chhuah lamah chuan Bawngkawn a\anga kawng hnuaiah kalin, Ramhlun tan tlangin Electric a\angin ITI veng lamah kal theih a ni dawn a ni.
No Vehicle Zone helna kawngah hian lirthei eng chi mah kawng dala dah phal a ni dawn lova, hei hian chhiatrupna, kangmei chhuak leh Emergency-a duty te a huam lo a ni. Aizawl chhim lam a\anga Bazar a kal turte tan Mac Donal Hill-a Govt. Mizo High School Field-ah lirthei hun theih a ni dawn a, kum danga Chanmari kawn a\anga Bazar kawnghnuaia Power house thleng lirthei tlan luh phal \hin chu tun \umah hi chuan phal a ni tawh dawn lo a ni. No Vehicle Zone hi karleh thawh\anni, urlawkniah neih chhunzawm leh a ni dawn a, No Vehicle Zone neihna huam chhungah hian kawng sira inzawrh phal a ni dawn lo a ni.
