Naktip, Thawh\annia Krismas lo thleng tur inpuahchahna chuan a vawrtawp a thleng ta a, vawiin khan Aizawl Bazar pawh ni dang zawng aiin a lun zawk. Zonet palaiin Aizawl Bazar chhung hmun hrang hrang a fan kualnaah Bazar hi ni dang zawng aiin a lun zawk a, sumdawngte chuan kumin hian inhralh har viau mah se, vawiin kha chuan ni dang zawng aiin inhralh a nuam zawk niin an sawi a. Chawhmeh zuarte pawhin, Inrinni dang zawng aiin chawhmeh an hralh tam niin an sawi a, naktuk, urlawk ni hi Pathianni a nih avangin chawlh a rei a, Krismas chawlhin a chhunzawm dawn avangin chhung tin an inlei duham deuh nia an hriat thu an sawi. Sa chi hrang hrang zuarte pawhin ni dang zawng aiin sa an hralh tam niin an sawi bawk.
Aizawl Bazarpui enkawltu Commerce and Industries Department hnuaia Commerce Wing hotute chuan, vawiin khan ni dang zawng aiin Bazar hi a tawt nia an hriat thu an sawi a. No Vehicle Zone siam a nih avang b^kah Bazar tura kal hi an tam hrim hrim nia sawiin, nikum urlawk ni ai pawh khan Bazar hi a lun zawk nia an hriat thu an sawi. Bazar chhung hmun pathumah mipuiin harsatna an tawh thulha \anpuitu tur, Police Help Desk siam a nih avangin mipuite thlamuang takin an Bazar thei a, heng hmun hrang hranga Duty-te hian an chhungte nena inhloh naupang report pahnih khat leh Phone leh Bag tibo tlem a zawng Report tih loh chu harsatna dang thleng a awm lo niin an sawi. Market Office enkawltute chuan, vawiin khan thil bo Report 3 chauh an dawn thu leh, kum dang tun ang hunah chuan pawisa tihbo ringawt pawh nuai bi a kai chho tawh \hin niin an sawi a. Nimin khan pawisa tihbo report, Rs. 35,300 leh naupang bo report 3 an dawng a. Vawiin khan pawisa tihbo report cheng 11,200 leh Phone bo report 1 an dawng a. Naupang bo report 3 an dawn zinga 2 chu an chhungte hmuh leh nghal a ni a, pakhat chu Aizawl Police Station-a pek a nih hnuah an chhungten an rawn lam leh niin an sawi. Market Office enkawltute chuan, pawisa bo report an dawn tam huin, thil chhar Report erawh chu an dawng mang lo niin an sawi a, thil chhar an hnena report hnuhnung ber chu December ni 19 daiha mi kha a nih tawh thu leh pawisa leh thil dang bo report an dawn tam zawk chu an bial pawn lam niin an sawi a ni.
