Korea ram leh a chhehvelah indona a thleng dawn lo tih South Korea President-i’n sawi

South Korea President, Moon Jae In-a’an Korea ram leh a chhehvelah indona a thleng dawn lo niin a sawi a, South Korea sorkar remtihna tel lo chuan Korea ram leh a chhehvelah indona thlentir theih a ni lo nia sawiin, US President, Donald Trump-a pawhin North Korea chungchangah eng thutlukna pawh siam se, South Korea a rawn hmasak loh chuan a takah a chantir dawn lo tih a sawi tawh a, indona a thlen loh nan theihtawpin a bei zel dawn niin a sawi. South Korea President hian ralthuam leh sipai chakna hman hnial lo anga insawi, Trump-a hian indo a duh tak tak lo niin a sawi a, North Korea vau zam a duh avang chauhin indo inpeih angin a lang niin a sawi a ni. Puan tawh angin, kar hmasa khan North Korea chuan Pacific tuifinriata US awp, Guam thliarkar lam hawia missile pali kah a tum nia a sawi avangin US sorkar a lungni lo hle a, President Trump-a phei chuan North Korea chu na taka chhan letah vauin, US sipaite chu North Korea bei turin an inralring reng tih a sawi a ni. Hemi hnu hian North Korea hruaitu lu, Kim Jong Un chuan missile kah chhuah a nih hmain US chet dan a ngaichang phawt dawn nia sawiin, Korea ram leh a chhehvelah US hian inrawlh chhunzawm zel a tum chuan a thil tum hi a taka chantir a ni dawn niin a sawi a, US hian indo a duh lo tak tak a nih chuan thutlukna dik siam hmasa se a duh thu a sawi a ni.