Korea ram leh a chhehvela buaina thleng mekin a vawr tawp a thleng tawh

UN-a North Korea sorkar palai, Kim In Ryong-a chuan nimin khan Korea ram leh a chhehvela buaina thleng mekin a vawr tawp a thleng tawh niin a sawi a, eng hunah pawh nuclear indona a chhuak thei reng niin a sawi. Ryong-a hian North Korea chu kum 1970 vel hnua khawvel ram zinga US-in nuclear ralthuam chungchang avanga rah beh tuma nasa taka a beih awm chhun nia a sawi bakah, North Korea ven him nana nuclear ralthuam kawl chu thil thiang leh dik niin a sawi a, hetih rual hian US-in North Korea hruaitu lu, Kim Jong Un-a paihthlak tuma a phiar rukna chu thil hlauhawm tak niin a sawi bawk. Puan tawh angin, North Korea hruaitu lu, Kim Jong Un-a chuan nuclear ralthuam siam chhuah kawngah an tum ram an thlen tawh avangin nuclear thil tih theihna neitu ram zingah an tel tawh nia sawiin, atom bomb, hydrogen bomb leh khawmualpui dang kap phak, intercontinental ballistic missile hmanga an hmelmate beihna tur pawh an nei tawh niin a sawi a, US-in North Korea a bei hmasa emaw, run a tum emaw a nih chuan na taka chhan let a tum thu a sawi a ni. Russia President, Vladimir Putin-a chuan nimin khan UN thupek zawmin, North Korea nena sumdawnna, zirna leh thil dang danga an inkungkaihna zawng zawng a chhu chat mek niin a sawi a, European Union pawhin North Korea chu nuclear ralthuam en chhin leh siam chhuah a tihtawp duh loh avangin a hrekna tur a ruahman a ni.