Kim Jong-Un’an North Korea palaite tha taka a lo dawnsawn vangin South Korea chungah lawmthu sawi

Nuclear ralthuam ti changtlunga missile a kah chhin fo avanga khawvel mit fukna North Korea hruaitu Kim Jong-un chuan North Korea palaite tha taka a lo dawnsawn avangin South Korea chungah lawmthu a sawi. Kim Jong-un hian North Korea palaite South Korea in ngaihpawimawh bika a lo neih avangin lawmthu a sawi tih North Korea State News Agency KCNA chuan a tarlang a ni. Kim Jong-un farnu Kim Yo-jong chu tun tum winter olympics-a North Korea palaite zinga a langsar ber pakhat a ni a, he infiamna-a North Korea a tel ve hi Korea ram pahnihte inkar boruak siamthatna hmanraw pawimawh taka ngaih a ni a, hetihrual hian North Korea hian thiam taka ram dangte hneh tumin lem a chang nia ngaitu an awm bawk. South Korea President Moon Jae-in chuan US pawh North Korea nena inbe tur hian a inhawng niin a sawi bawk. Korea ram pahnih hruaitute hi kum 1950 indo hnuah an intlawh pawh tawn meuh lo a, ram pahnihte hian inremna ang chi ziah an la nei bawk lo a ni. Inrinni khan Kim Jong-un a farnu Kim Yo-jong hian a unaupa lehkhathawn, Pyongyang tlawh tura sawmna chu South Korea President Moon kutah hian a hlan a, hei hi a hlawhtlin theih chuan kum tam tak ral hnua ram pahnihte inbiak lehna hmasa ber a ni dawn a ni.