Mizorama University, College, School, Anganwadi leh Pre-school zawng zawng khar rih tur a ni a. Exam nei laklawh laite erawhin a ngaiin an chhunzawm ang a. Gym, Picnic Spot, Cinema Hall leh Swimming Pool te pawh hemi hun chhung hian khar lailawk rih tur a ni. Mizoram University chuan April ni 3 thleng Class suspend rihna tur thupek a ti chhuak bawk a, office pangngai erawh dawr theiha hawn chhunzawm a ni thung ang.
Health Minister Dr. R. Lalthangliana hova sorkar mipawimawhte vawiina Aizawla \hukhawmin Chief Minister Pu Zoramthanga an biakrawn hnuah he thutlukna hi an siam a. Hri leng darh zel tur khuahkhirhna dan, The Epidemic Diseases Act, 1897 tlawh chhanin mipui punkhawmna hmun kharna thupek hi siam tur a ni a, thil awmdan a zirin heng zirna in hrang hrangte hawn hun tur hi la rel \hat leh theih a ni ang.
Sawrkar enkawl District Hospital hrang hrang leh private leh kohhran enkawl Damdawiin zawng zawngah mipui punkhawm khap mek chu chhunzawm zel ni se tih an rel bawk a, mipuite pawh puipunna hnaivaia awm lo tur leh puipunna a kal lo turin an ngen nawn a. Residential Institution leh Home hrang hrang te pawh pawn lam atanga tlawh phal loh ni se, heng hmunah te hian lut thar an awm anih pawhin an taksa hriselna dinhmun uluk taka endik hmasak nise an ti a ni.
Kohhran hrang hrangah Covid 19 chungchanga hriattur pawimawh, mithiamten invenna atana pawimawh tih tur leh tih loh tur an duan chhuah te inzirtir an rel bawk a, Mizoram Kohhran Hruaitu Committee (MKHC) kaltlangin Sande sikulah inzirtirna hi March ni 22.-ah nei tura ngen nise an ti a ni.
Health Minister Dr. R. Lalthangliana chuan College hrang hrang Principal te leh MZU hotute a lo biak rawn tawh thu a sawi a, Chief Minister a biak rawn hnuah hri leng laka him theihna turin College leh Zirna In dangte khar lailawk rih chu an duhdan a nih thu a sawi.
|hutkhawmnaah hian Health and Family Welfare Board Vice Chairman Dr. ZR Thiamsanga, Chief Secretary Pu Lalnunmawia Chuaungo leh Health Secretary Pu H.Lalengmawia bakah Dept \henkhat hotute an tel a ni.
