He hri a len ve lohna tura hma la tura din – Sub-Division Level Task Force on Mitigation of Corona Virus \hukhawmin an lo rel tawh bawhzuiin, Tlabung khaw chhunga hmun hnih, Khawthlangtuipui kamah ramri-a veivakte lo en dikna hmun – screening point hawn belh a ni a, Kawrpuichhuaha lo awm tawh sa tiamin, heti hian India leh bangladesh inrina dep Tlabung leh a chhehvelah screening point pathum hawn a ni ta a ni.
Tlabung SDO (C) Pu Lalsanglura, chuan, he hri a len lohna tura mahni theihna zawn theuha hmalak chu mi tin mawhphurhna a ni tih sawiin, mipuite chu thawhpuiah a sawm a, ramri-a veivakte chu an dinhmun hriat chian a nih theih nan, screening point hrang hranga inziak lut phawt thin turin a chah a ni.
Licheng leh Missionary Kai-a screening point hawn belhte hi, Tlabunga Health department-a thawkten thutchilh ve vein, anmahni puibawmtu tura ruat Sorkar department danga thawkten an thutpui a, a tlangpuiin ramri hrul khaw hrang hrang atanga meilawng leh lawngleng hmanga Tlabung pan turte chu screening point-ah hian he hrileng an kai a rinhlelhawm leh awm loh endik zel a ni.
Screening point pahnihah hian mi 100 bawr vel endik nghal an ni a, an zingah hian he hri vei rinhlelh theih tur an la awm lo tih, anmahni lo endiktute chuan an sawi.
