Tlabung SDO (C) Pu Lalsanglura chuan, he hri tai darh zel tur venna tura danin thuneihna a pek tlawhchhanin, Mizoram pawn atanga Tlabunga hawte khuahkhirh dan tur ruahmanna a siam nghal a, hei bakah hian, Khawthlangtuipui Group YMA chuan, an group huam chhung khaw hrang hranga mipuiten an zawm tlan tur duangin, Tlabung bazar chu khaw pawn lama miten March thla chhunga an tlawhpawh an rem tih loh thu an puan bakah, Tlabunga sumdawngte pawh hemi hun chhung vek hian khaw pawna sum dawnga vak chhuak lo turin an chah bawk.
Hetih lai hian Presbyterian Chawnpui Kohhran pawhin, thla thar April ni 15 thleng an Biak-In an khar tih puangin, Pathian biak inkhawm pangngai bakah, a penhleh Kohhran mipuiten a huhoa hun an hman tlan ngai chi reng reng an titawp lailawk vek a, Tlabung khaw thenawm Nunsury-a vawiina pawl hrang hrang aiawh thukhawmte pawhin, an khua chu hmun dang atanga tlawh pawh an khap bakah, mipui inhnangfakna dawrte pawh hemi chungchang rel that a nih hma chu hawn an remtih rih loh thu an puang bawk.
