AH&Vety Minister Dr K Beichhua chuan vawiin khan Aizawlah chanchinbumite kawmin sorkar khapna dinglai bawhchhia-a Myanmar a\anga vawk lakluh man tur a awm leh \hin chu pawi a tih thu a sawi a, sorkarin vawk lakluh a khap chhan chu vawk pul hri, PRRS vanga Mizorama vawk vulhtuten harsatna nasa tak an tawh mek tih reh tumna a ni a, hei bakah hian tunhnaia khaw chhak lam ram \henkhat, China, Vietnam, Cambodia, Hongkong leh a ramdang \henkhata vawk pul hri hlauhawm leh zual, African Swine Fever leng mek lakah Mizoram a him theihna turin Myanmar a\anga vawk lakluh khapna chu \ha taka zawm a \ul a ni a ti a, sorkar hmalakna \awiawma sorkar tha ti chaktu ni turin mipuite a sawm a ni.
Dr K Beichhua \awiawmtu AH&Vety Dept hotute sawi danin, Myanmar a\anga vawk lakluh hi tihtawp vek a nih chuan Mizorama PRRS chambang chu zawi zawia reh hlen tura ngaih a ni a, PRRS vang hian kum 2013 khan Mizoramah vawk 3806 a thi a, 2016-a a len nawn leh khan 4699 a thi a, nikum khan 2574 a thi leh a, vawk thi vanga sum hloh hi cheng nuai 1,062 hu a ni tih AH&Vety Dept hotute chuan an sawi.
Hetihrual hian khawchhak lam ram \henkhata leng mek vawk pul hri hlauhawm leh zual African Swine Fever hian Mizoram a thlen lohna turin ramdang a\anga vawk lakluh chu hneh taka dan chah a \ul tih AH&Vety Dept hotute chuan an sawi a, he vawk pul hri hi vawkin a kai tawh chuan a thihpui ngei ngei avangin, Mizoramah a lo thleng anih chuan mipuite sum leh pai dinhmun pawh nasa takin a nghawng thei dawn tih an sawi.
Ramdang a\anga vawk lakluh khapna dan, CrPC 144 tlawh chhana District Magistrate ten an puan \hinah, a bawhchhetute hremna a na lo hle chu an harsatna tawh zinga pakhat a ni tih AH&Vety Dept hotute hian chanchinbumite zawhna chhangin an sawi a, AH&Vety Minister Dr K Beichhua chuan a \ul anih chuan Dan \ha zawk pawh duang tura hmalak a ni ang a ti. CrPC 144 tlawh chhana thupek chhuah bawhchhetute hi IPC 188 hmanga hrem theih ni mahse, hremna na ber pawh thla 6 chhung lung in tan leh cheng sang 1 chawitir chauh a ni.
