Hachhek tlang dunga khaw hrang hranga tlan thin, khualzin phur, Maxicab-te chu kawng chhiat avangin vawiin atang khan an chawl. Hemi chungchanga Hachhek Constituency Maxicab Welfare Committee thuchhuah tarlan danin tun thla ni 9, Inrinni thleng khian an chawl phawt ang a, hemi chhunga kawng hi siam that a nih loh chuan a aia rei zawk chawlh chhunzawm a tul dawn niin an sawi. Hachhek tlangdung khaw hrang hranga tlan thin Maxicab, tuna Aizawla awm mekte erawh chu an khuaa an haw theih nan ngaihhnathiam an ni. Kan Corr. sawi danin Hachhek tlang dunga tuna kawng chhiat zualna te chu Dapchhuah, Mamit, Tuidam, Kawrthah, Rengdil, Zamuang, Zawlnuam leh Kanhmun inkar kawngte, Kolasib lam atanga Mamit District panna – Rengtekawn, Meidum, Pangbalkawn, Bairabi, Saikhawthlir, Chuhvel leh Zamuang kawngte a ni a, tunah hian heng kawngah te hian Maxicab leh truck-te pawh a tlan hlei thei tawh lo nia thu dawn a ni. Hetiang bawk hian Sateek leh Darlung inkar kawng chhiat lutuk avangin Darlung Centre Maxi Cab Driver’s Association chuan naktuk atangin tiam chin awm lovin he kawnga Maxi Cab Service chu chawlhsan an tum a, an hotute sawi danin Sateek-Darlung kawngah hian Maxicab Service hian Darlung, Sabual, Bawngthah leh Bawlte khuate a tlawh a ni.
