Power & Electricity Deptt-in kawlphetha hmangtuten an hman man, tuna connected load rate anga an pek mek chu contracted load anga an pek theih nan tunlai hian a buaipui mek a, ZONET zawhna chhangin Power & Electricity Deptt. Engineer-in-Chief, Pu L. Pachuau chuan kawlphetha hman man chhut dan tihdanglam tum chhan hi Mizoram Consumer Union ngenna leh duh dan niin a sawi. Tuna hman mek, connected load anga electric hman man pekah hian a hmangtute chenna ina power point hrang hrang awm zat chhuta a hman man hi chawitir an ni a, hei hi contracted load anga chhutsak a, an bill siam a nih hunah chuan a tak taka electric an hman man chiah, a hmangtuten an pek a ngai tawh ang a, amaherawhchu, an hman ang ni lo, a aia tlem zawka hmang nia insawite chu man chhuah an nih chuan pawisa chawitir an ni tawh dawn niin a sawi. Engineer-in-Chief chuan contracted load anga electric hman man pek a nih hunah chuan chhungkaw tam tak electric bill chu a tlem zawk beisei niin a sawi a, he dan tharah hian electric hman zat dik tak, a hmangtuten an pe dawn niin a sawi. Engineer-in-Chief chuan he kalphung thar hman nan hian mipuite chu tun thla chhung hi hun pek niin a sawi a, hemi chhung hian veng hrang hrangah an Deptt. hnathawkte chuan electric hmangtuten an hman zat an ziah luhna tur form an sem mek niin a sawi a, he kalphung thar ang hian tun thla chhunga thil tihfel hman a nih loh chuan hun hi pawhsei pawh a la tul mai thei niin a sawi bawk.
