Trump-a leh a nupui hian ni hnih cham turin Ahmedabad an tlawh dawn a, Ahmedabad-a cricket stadium sak tharah ‘Namaste, Trump’ tih programme-ah an tel ang a, hemi hnu hian Delhi lam an pan dawn a ni.
US lam mi, venhim hna thawktute chuan Taj Mahal hi tlawhin an enfiah hmasa tawh a, Taj Mahal hung chhung cheimawina tui chik chhuak te pawh tihfai a nih abakah a tui te pawh thlak a ni. Taj Mahal bul vela dawr leh chenna in te chu rawng hnawih thar a ni a, police te chuan hmalakna te hi venhimna kawnga thil tih sual palh a awm lohna tur niin an sawi.
Hetihlai hian Yamuna luiah pawh tui tam tak, cusecs 500 vel chu Uttar Pradesh Irrigation Dept in an chhunluh belh a, Yamuna lui hi thil siamna thli tam tak luanluhna a nih avangin a bawlhhlawh nasa a, tuna tui chhunluh belh hian a rim chhia a ti ziaawm tura ngaih a ni tih Uttar Pradesh Pollution Control Board-a Assistant Engineer chuan a sawi.
Ahmedabad ah hian mi nuai khat velin US President Donald Trump hi an lo lawm dawn tih Municipal Commissioner Vijau Hehra chuan a sawi a, Ahmedabad khawpui chhung km 22 vela thuiah Prime Minister Narendra Modi leh President Trump-a te hi an kal tlang dawn a, hemi hmalam hian Trump-a chuan chanchinbumite a kawmnaah anmahni lo hmuaktu tur hi mi maktaduai 7 vel an ni dawn niin a lo sawi tawh a ni.
Hetianga US President ropui taka lo hmuah tum a nih mek lai hian mi \henkhat erawh chu a hmuh loh tura thup tum mek an ni bawk a, Ahmedabad Municipal Corporation chuan Trump-a paltlang tur kawng sira miretheite chenna hmun slum area hliahna turin feet 4-a sang hungna a siam a, hetihlai hian Municipal Commissioner Vijay Nehra erawh chuan hungna siam chu kawngpui leh mihring kea kal humhalhna tur zawk nia sawiin thla hnih liamta ah khan hung tura thutlukna siam a lo ni tawh niin a sawi thung.
