Lai Autonomous District Council hnuaia VC 8 leh Chakma Autonomous District Council hnuaia VC pakhata seat ruak hnawh khahna tur, by-election chu kar leh Thawhlehni khian neih a ni dawn a, hemi atan hian vawiin khan inthlan buaipuitu turte pawh training pek an ni a, training zawh hnu hian inthlannaa an hman tur hmanrua-te pawh Returning Officer te kutah pek chhuah a ni. Heng mite hian naktukah an duty-na tur Polling Station theuh an pan ang a, kar leh Thawhtanniah chuan an Polling Station theuhah vote thlak theiha engkim ruahman fel tura tih an ni. Lawngtlai Election Officer, Pu Lalrinawma hnen atanga thu dawn danin, LADC hnuaia VC 8-a seat ruak 19 inchuh turin candidate 38 an awm a, chung khuate chu Chawngtelui, Ngengpuitlang, Hmawngbuchhuah, Dumzautlang, Bolisora, Tuisentlang, Lawngtlai Vengpui leh Archhuang te a ni a, Chakma Autonomous District Council hnuaia Gabasuri khuaa VC seat 1 luahtu tura thlanna turah candidate 2 an awm bawk a ni. District Council pahnih huam chhunga VC seat ruak 19 chuh tur hian General candidate 34 leh hmeichhe tana seat hauh chuh tur mi 6 an awm a ni. Lawngtlai District-a VC by-election neihna tur khaw 9 zinga khaw 4 chu a hlat avang leh kawng a that loh avangin Polling party-te hi an chhuah hma a ngai a, Gabasuri khua phei chu Parva thleng, motor-a kal hnuah ke-a darkar thum kal leh a ngai a, heta tang hian lawngin darkar khat kal leh a la ngai a ni. Vote thlak ni atana ruat, ni 22-ah chuan zing dar 7 atanga tlai dar 5 thleng vote thlak a ni ang a, vote tla-te hi Returning Officer hova chhiar a nih hnuah result pawh puan nghal a ni ang a, kawng leh inbiakpawhna that tawk loh avangin inthlan result hi vote thlak ni tukah chauh a hriat kim theih beisei a ni.
