Kawngpui hnawhtu lung tlate hi PWD Aizawl South Raod Division chuan tukin a\ang khan an thian nghal a, lung tlakna kawng chhak lamah tla leh mai theih tur ala awm avangin kawngpuia lung tla an then bakah kawng chhak lam kova lung tla mai theite chu hal a ni a. Hemi vang hian Ngaizel kaltlanga Lunglei lam panna kawngpui chu khar vek a ni. PWD hotute chuan, lung tla sa bakah kawng chhak lama tla leh mai thei an hal avangin vawiin hian kawngpui hi a tlang hman dawn lo niin an sawi a. An lung hal thawh nat dan a zirin helai kawngpui hi tunkar chhung pawh khar a ngai maithei tih an sawi. Puan tawh angin kalta nilaini zing dar 5:20 vel khan Ngaizel kawngchhak lam lei hi a min a, hei hian kawng thlang lama TK Two wheeler Workshop chu a hnawl vek a, workshop chhunga Two Wheeler siam tura dah 6 pawh a hnawl tel a ni.
Ngaizela Aizawl leh Lunglei inkalpawhna kawngpui ping vang hian Kulikawn a\anga chhim lam pan turte chu Tlangnuam lamah kal tir an ni a. Melthum lam a\anga Aizawl khawpui chhung lut turte chu Hridaikawn lama kaltir an ni thung a. Heng kawng pahnihte hi a tet deuh avangin lirthei lian chite chu Aizawl By-Pass Road, World Bank kawnga kal turinTraffic Police chuan a ngen a. Tlangnuam leh Hridaikawn lama kawng helnaah pawh lirthei tlan tana hnawk theia engmah dah lo turin an ngen a ni.
