Kabul-ah thihchilh bomb puak, mi 40 thi

Afghanistan khawpui, Kabul khawthlang lama Shia sakhaw pawl hmun pawimawh chu thih chilh bomb hmanga beih a nih avangin mi 40 an thi a, mi dang 30 an hliam. Afghanistan sorkara interior ministry hotuten BBC an hrilh danin, he thih chilh bomb tihpuah a nih hnu hian bomb dang pahnih pawh tihpuah a ni a, pawi khawihtu hi hriat an la ni lo. He hmun hi Tabayan cultural centre tih a ni a, a bul lawkah Afghan Voice news agency hmun pawh awm mah se, pawi khawihtute hian he Cultural centre hi beih an tum ber nia hriat a ni a, he thil thlen lai hian he hmunah hian zirlai engemawzat an tel a, hei hi Soviet Union-in Afghanistan a awp kum 38 tlinna puala buatsaih a ni. Afghan Voice hnathawk pakhat pawh he thil thlengah hian a thi a, mi dang 2 an hliam bawk a, Islamic State pawlin he thil hi an tihah chhal mah se, BBC chuan hei hi nemngheh a la ni lo niin an sawi. Taliban chuan he thilah hian an inhnamhnawih lo niin an sawi a, heng pawl pahnih hian Afghanistan ramah hian pawi an khawih fo a, Taliban ho hi chuan Shia mite an bei ngai meuh lo nia hriat a ni. Afghan sipaiten IS mite hi an bei nasa hle na a, an la hneh fel hlei thei lo a, tunah hian IS mite hian rawlrala ch>t an ching a, mi 1,000 a\anga 5,000 vel an nei nia hriat a ni. IS hian Shia mite hi sakhaw phatsantu-a an ngaih avangin, Afghanistan ram buaina hi Sunni leh Shia Muslim-te inbeihnaa chantir an tum nia hriat a ni a, October thlaah pawh khan Shia biak in pakhat beihnaah mi 39 an thi a ni.