Kabul-ah thihchilh bomb pahnih puak, mi 23 thi

Afghanistan khawpui, Kabul-ah vawiin khan thihchilh bomb pahnih tihpuah a ni a, mi 23 an thi a, midang engemawzat an hliam. Bomb hmasa zawk hi Farah District-a sipai hmunah tihpuah a ni a, mi firfiak pawl thahnem takin zing khawvar hma khan helai hmun hi an bei a, thihchilh bomb hi tihpuah zui a ni a, mi 18 an thi a ni. Thuneitute chuan mi firfiakte hi an la awm nia an hriat avangin, sipai thahnem tak hemi hmunah hian an thawn belh tih an sawi bawk a ni. Bomb pahnihna hi Kabul khawpui chhunga sorkar pisa hrang hrang awmna hmunah tihpuah a ni a, mi pathum an thi a, a ti tute chhui chian mek a ni tih Defence Ministry thupuangtute chuan a sawi a ni. Taliban mi firfiak pawlte chuan bomb hi an tihpuahah an chhal tawh a ni. Myanmar Rakhine State khawpui, Sittwe-ah tukin khan bomb pathum tihpuah a ni a, thi an awm lova, police pakhat a hliam. Thuneitute chuan bomb pathum puak bakah hian la tihpuah loh pathum dang an chhar niin an sawi a, bomb pakhat hi sorkar mi pawimawh tak pakhat in a tihpuah a ni a, bomb puak vanga thil chhia-te hi an la enfiah mek tih Police-te chuan an sawi a, kawtthler tam zawk chu kal pawh theih loha khar rih niin an sawi bawk.