Kabul-a US embassy bula thih chilh bomb puakah mi 4 thi

Afghanistan khawpui, Kabul-a US embassy bulah thih chilh bomb tihpuah a ni a, mi 4 an thi a, midang eng emaw zat an hliam. Afghanistan Interior Ministry thupuangtu sawi chuan he thil hi an ram sanaa vawiin chawhma dar 10 vela thleng niin a sawi a, mi firfiak hian thih chilh bomb hi US embassy atanga hnai te, private bank pakhat bulah a tipuak a, bomb tihpuah a nih lai hian bank dawr tura kal mi eng emaw zat an awm a, Health Minstry chuan damdawi inah ruang pakhat leh hliam 8 hruai luh an ni tawh tih a sawi a, bomb puak avang hian bank building hma lampang a chhia ni a hriat a ni. He pawikhawihna i eng pawl mahin an tihah la chhal lo mah se, tun lai hian Taliban mi firfiakte’n pawi an khawih fo avangin an tih a nih rin a ni a, 2014 kum tawp lama North Atlantic Treaty Organization sipaite’n Afghanistan an chhuahsan hnu atang khan, Afghanistan sipaite leh police-te chuan Taliban ho hi an hneh let hlei thei lo nia sawi a ni. Puan tawh angin, kumin May ni 3 khan Afghanistan-a US embassy leh NATO pisapui bula ramdang sipaite chuanna motor chu mi firfiakte’n bomb hmangin an bei a, he thil thlengah hian mi 8 an thih bakah mi dang 28 vel an hliam a, hemi hnu hian Kabul-a sorkar mi pawimawhte awmna vengah mi firfiak pawlte chuan truck bomb hmangin pawi an khawih leh a, mi 150 vel an thi a ni. US President Donald Trump-an Afghanistan-a America sipai tirh belh a nih tur thu a sawi sawi hnu khan, kum 1996 atanga kum 2001 inkar chhunga Afghanistan awptu, Taliban hian Afghanistan chu ram dang sipaite thlanmuala chantir a tiam a ni.