Zonet thudawn danin PIL thehluh danah hian dan anga tih tur \henkhat a kim loh avangin Court hian ngaihtuah zui lovin a titawp rih a, hemi rual hian PIL thehluttute chu sorkara an lungawi lohna te thlen turin a ti a, sorkar lam bawhzui tur leh tih tur \hahnem tak a tuk sak bawk. Heng zingah hian, dawr leh damdawiin ang chi te siam phalna AMC in a pek dawna lirthei dahna tur enfel chungchang te, motor kawngpui sira dan lova lirthei dah khapna kenkawh chungchang te pawh a tel a ni.
Mizoram Bar Association hian May ni 30 khan Gauhati High Court Aizawl Bench-ah PIL hi an thehlut a, hei vang hian June thla tir a\anga ni khata lirthei number tawp 2 zel ding tura sorkar in ruahmanna a siam chu hman theih a ni ta rih lo a, sorkar ruahmanna siam ang hi chuan Thawh\anniah lirthei number 1 leh 2 a tawpte an tlan thei dawn lova, thawhlehniah 3 leh 4, nilainiah 5 leh 6, ninganiah 7 leh 8 leh Zirtawpniah 9 leh 0-a tawpte an tlan thei dawn lo a ni.
Court in PIL hi ti tawp mahse, intlan chhawk dan thar hman tur chungchangah thutlukna mumal tak erawh siam a la nih loh avangin, engtianga kalpui zel tur nge tih chiang taka hriat theih a la ni rih lo a, zonet thudawn danin Home Minister kaihhruai Coordination Committee on Traffic Management-in court thutlukna hi a thlirho thuai rin a ni.
