June ni 12-a North Korea hotu Kim Jong-un leh US President Donald Trump-a te inbiakna neih turah inbuatsaihna kalpui chhoh zel a ni

June ni 12-a North Korea hotu Kim Jong-un leh US President Donald Trump-a te inbiakna neih turah inbuatsaihna kalpui chhoh zel a ni tih US in a sawi. White House chuan ram hruaitu pahnihte hi Singapore sana-a zing lam dar 9 ah an inbia ang tih a sawi a, North Korea in nuclear ralthuam a tih tawp loh chuan North Korea hrekna chu hlih a ni dawn lo tih a sawi nawn leh bawk. Singapore-a inbiakna neih hun a thlen hmain hapta khat chauh awm tawh mahse, inbiakna neih dan tur kimchang puanzar a la awm lo a, Singapore khawi hmunah ber nge an inbiak dawn tih pawh sawi chian a la ni lo thung. An sawidun turah Nuclear ralthuam tihtawp chungchang chu a langsar ber tur nia hriat a ni a, thil chinchang zir bing mi \henkhat erawhchuan Korea ram pahnihte inkara inremna tluantling a awm theih dan tur chu an sawi dun an ring bawk. North Korea lam nena inrem lohna engemaw a awm avanga Donald Trump-an inbiakna a\anga a inhnuhdawh thu thla hmasaa a puan hnuah inbiakna hi neih ngei a ni dawn em tih pawh a chiang thei ta lo a, White House thupuangtu Sarah Sandars chuan President hian North Korea chungchangah hian National Security Team te a berawn reng tih a sawi a, ruahman lawk dan chuan ram hruaitu pahnihte hi Singapore ah zing lam dar 9 ah an inbe dawn tih a sawi a, hei hi Washington sana ah chuan Thawhlehni zan dar 9 a ni thung ang. Inbiakna neih dawn aruaiah North Korea hian ram dang a dawr kual nual a, Russia Foreign Minister Sergei Lavrov chuan tunhnai khan Pyongyang a tlawh thut a, hetah hian Kim Jong-un a’n Moscow a tlawh dan tur pawh an ruahman a. Russia chuan US in ramdangte nena inlaichinna siam a tumna kawngah inrawlh a tum lo tih a sawi thung.