Ram chhung hmun dang rual, nikum July ni 1 atanga Mizoram sorkarin Goods & Services Tax (GST) a lak tan ve-ah harsatna lian tham tawh a awm lo. ZONET zawhna chhangin Taxation Deptt. hotute chuan kumin sorkar kum, 2017-2018 chhunga an sum hmuh tura bituk cheng vaibelchhe 300 chu an hmuh tlin theih a beisei awm a, tunah hian an sum hmuh beisei zat atanga chhuta za zela 80 vel an hmu tawh a, a bak za zela 20 chu tun thla leh thlaleh chhungin hmuh theih beisei a ni. Tun hmalama chhiah lak thin dan titawp a, GST lak a nih hnu hian sumdawngtu thenkhat chhiah pe tur ten thil tih dan an zir chawp avangin a thiam lote tana inhrilhfiahna Zodin Square-a Transport Deptt. building bula an Office-ah Facillitation Centre siam a ni a, hetah hian thil tihdan thiam Officer 2 tanpui ngaite tanpui turin dah reng an ni a, chhiah pek dan tharah hian Internet hmanga online system-a chhiah pek a ngaih tak avangin thil tihdan thiam lote chu puih thin an ni. Tun hmalama GST hman hma khan Mizoram Taxation Deptt.-in chhiah a lak thin te chu Value Added Tax, Entry Tax, Entertainment Tax, POL Tax leh Professional Tax te a ni a, rampum huapa GST dan thar hmanga chhiah lak a nih tak hnuah Petrol leh zu atanga chhiah lak bak chu GST hnuaiah lak vek a ni ta a, Petrol leh zu chhiah te erawh chu VAT hnuaiah lak chhunzawm a la ni thung.
