Republic Day boycott an tum chungchang hi vawiin khan Chief Minister, Pu Zoramthanga’n a sawipui a, hun engemaw chen an inbiak hnuah Republic Day hi mipui nawlpui tel lova hman remtih a ni. Jt. NGO Coordination Committee hruaitute nen an inbiaknaah hian Chief Minister, Pu Zoramthanga chuan, Republic Day boycott an tum chhan Citizenship Amendment Bill, 2016 chu Mizoram Sorkar, a bikin MNF Party pawhin an duh lo hle tih sawiin, tun hnaia New Delhi-a Mizoram pawimawh buaipuia a kal\um khan he Bill an duh loh thu hi Prime Minister leh Union Home Minister a sawipui tih a sawi a. He Bill duh loh lantir nana Jt. NGO Coordination Committee-in Republic Day Boycott an tum chu a hriatthiampui rualin, Republic Day chu ni pawimawh bik, MNF kaihhruai sorkar thar pian hnua hman hmasak ber tur a nih avangin hman ve loh chu thil remchang a nih loh avangin an thil tum chu \hulh hram turin a ngen a ni.
Chief Minister ngenna hi Jt. NGO Coordination Committee hruaitute chuan an ngaihtuah leh hnuah Republic Day Boycott an tum chu a hmaa ruahmanna an lo siam tawh ang lo deuhin kalpui ni se, Lammuala Republic Day hmanna turah hian Minister, MLA, MP leh Sorkar Official tlem bakah chawimawina dawng turte bak kal loh ni se, silai keng sipai leh Police tih loh sikul naupangte chu Parade naah tel loh ni se an ti a ni.
Chief Minister hova an \hutkhawm zawha Zonet zawhna chhangin Joint NGO Coordination Committee Chairman, Pu Vanlaluata chuan, Republic Day Boycott an tum chungchangah hian nizan khan Sorkar hotuten Mizoram Kohhran Hruaitute Committee hotute lamkalah tirin an thil tum hi \hulh turin an ngen tih a sawi a. Vawiina Chief Minister hova an \hutkhawmnaah Chief Minister hian a kaihhruai sorkar thar hnuaia ni pawimawh an hman \umkhatna tur a nih avangin an thil tum hi \hulh hram turin a ngen a, he ngenna hi an zah avangin a hmaa ruahmanna an lo siam tawh chu thlah dulin mipui nawlpui tel lova, mipawimawh zualten an hman an remti ta tih a sawi. Pu Vanlalruata chuan, ruahmanna an siam hmasak hi thlah dulh deuh ni mah se, naktuk zing dar 6 a\angin Aizawl chhim leh hmar lam a\anga Lammual panna kawng pawimawhah te uluk takin Duty an indah dawn tih a sawi a, sorkar hotute nen an inbiakremna piah lama Republic Day hmannaa tel tumte chu an dang vek dawn tih a sawi a ni.
