J&K Kathua hmuna hmeichhe naupang pawngsual leh thah a nih chungchang thubuai kal zelah, pawikhawihtua puh mi 8-te chu District Court-ah vawiin khan hruai an ni a, pawikhawihnaah an inhnamhnawih lo nia sawiin, Narco Test hmachhawn an dil.
Puan tawh angin he hmeichhe naupang, Asifa hi muslim mi a nih avangin inhnialna a tam hle a, pawikhawihtua puhte hian \antu an ngah a, tualchhung political party leh pawl \henkhat-ten an thlawpna lantirn kawng te an zawh a, he kawngzawh thlawptu, State Minister pahnih-te chu CM Mehbooba Mufti-i’n a lo ban tawh a ni. Jammu Bar Association-a ukil-te pawh he kawngzawh-ah hian an tel a, police-te thiltih dan an duhkhawp loh thu te leh, CBI kuta hlanchhawn an phut thu-te pawh an lo sawi tawh a ni. He thil thleng chungchangah hian PM Narendra Modi chuan pawikhawihtu zawng zawng man chhuaka hrem ngei an nih tur thu a sawi tawh bawk. Kum 8 mi, Asifa pawngsuala thah chungchanga police-ten an thil chhui dan Court-a an thehluh-ah chuan ruahmanna zawng zawng siamtu chu State Revenue Department hotu hlui, Sanji Ram a ni a, Kathua Rasana-a muslim cheng-te umchhuah tuma he ruahmanna hi siam a nih thu tarlan a ni a, pawikhawihtua puh-te hian Narco Test an neih zawhah thudik a langchhuak dawn niin an sawi ve bawk a ni. Narco Test hi damdawi hmanga mi thu zawhfiahna a ni a, nikhua an hriat kim theih loh avangin, dawt sawi a harsa hle a, mahse India danpui Article 20-na chuan Narco Test hmanga mi thusawi reng reng inpuanna anga pawm a remti lo ve thung a ni.
Hetihlai hian Asifa pawngsual leh thah thubuai ngaihtuahna hi J&K a\anga sawn chhuak turin Asifa-i pa chuan Supreme Court a ngen a. Asifa pa chuan a fanu thubuai vang hian J&K-ah mi huat an hlawh hle niin a sawi a, an chunga thil eng emaw a thlen mai an hlauh avangin, Chandigarh lama thubuai ngaihtuah chhunzawm a dil a, an ukil Deepika S Rajawat pawhin he thubuai vang hian a nunna a derthawng hle tih a sawi ve bawk a, pawngsual emaw, thah emaw tawng thei reng a nih thu te leh ngaihdam a nih loh tur thu vauna te pawh a dawng tih SC a hrilh ve bawk a ni. Asifa pawngsual leh thattu-a puh-te zingah hian police pahnih pawh an tel a, an thiltih sual thuppui tumtu police dang pahnih lakah pawh thubuai ziah luh a ni tawh bawk a ni.
