Jammu & Kashmir khawpui, Srinagar-a Pantha Cowk venga mi firfiakten police bus an beihnaah police 1 a thi a, mi dang 7 an hliam. Police-te sawi danin, nizan dar 8 vel khan Srinagar leh Jammu inkar kawnga Bemina atanga Zewan lama pana kal, police bus pakhat chu mi firfiakte’n an lo kap a, police 7 vel an hliam a, hliamte hi Badami Bagh-a sipai damdawi inah hruai an nih hnuah, Head Constable, Kishan Lal-a chu a hliam tuar lovin a thi a, hliam zinga pahnih pawh an ngaihtuah awm hle a ni. Mi firfiakte hi eng pawla mi nge hriat la ni lo mah se, Lashkar-e-Taiba chuan an tihah an chhal a ni.
Tukin khan J&K-a Kulgam district-ah sipaiten Lashkar-e-Taiba mi firfiak, Ishfaq Padder-a chu an kap hlum a, amah hi kumin May thlaa Shopian district-a sipai hotu pakhat, kum 22 mi, Lieutenant Ummer Fayaz-a ruk bova thah a nih chungchangah khan a inhnamhnawih ve nia hriat a ni a, chanchinbu thenkhat sawi danin, Padder-a kah hlum a nih hnuah pawh hian sipaite leh mi firfiakte chu an la inbei chhunzawm zel a, hei vang hian Shopian leh Kulgam-ah pawh internet service tihtawp lailawk a ni.
