Health Department a Integrated Disease Surveillance Programme State Nodal Officer Dr Pachuau Lalmalsawma chuan Mizoram chu Japanese Encephalitis natna lakah ala him niin a sawi. ZONET zawhna chhangin Dr. Pachuau Lalmalsawma chuan, tunhnai atang khan Manipur State-ah Japanese Encephalitis, Dengue leh Swine Flu leng mahse tundinhunah Mizoram chu he natna lakah hian a la fihlim niin a sawi a, he natna leng veng tur leh harsatna a thlen thulha hmalak dan tur chungchangah sorkar laipui nen an inbe pawp niin a sawi a, he natna hian Mizoram a rawn thlen thulh pawha rang taka hma la thei turin Department chu a inring reng niin a sawi bawk. Dr Pachuau Lalmalsawma chuan Manipur hnaih khua Suangpuilawn leh Sakawrdai-a Primary Health Center te pawh he hri leng hi a awm em tih enfiah a vil reng tura hriattir niin a sawi a, hemi rual hian Japanese Encephalitis, Dengue leh Swine Flu vei nia inringte chu rang taka damdawi in hnai bera inentir tura ngen an ni tih sawiin Japanese Encephalitis leh Dengue natna pu darh tu thosi pian theihna tui tling awmte ti bo tur leh in leh a vel vawng fai turin mipuite a ngen bawk a ni.
