Japan rama US helicopter thlawk lai tukverh darthlalang tla, naupang pakhat hliam, mipui lungawi lo

Japan rama US sipaite helicopter thlawk lai tukverh darthlalang a tlak avangin, mipa naupang pakhat a hliam a, Okinawa-a japan mipuite an lungawi lo hle. Helicopter darthlalang hi sikul pakhat tualah a tla a, hetih lai vel hian zirlai 50 vel, a bul hnaiah an awm tih thuneitute chuan an sawi a, Japan Chief Cabinet Secretary, Yoshihide Suga chuan hetiang thil hi thleng lo tura an ngaih thu leh, he sikul chauh ni lo, Okinawa-a cheng mipui tiralkhel thei thil a nih thu leh, US sipai hotute hi insawifiah tura koh an nih tur thu a sawi a ni. Okinawa-a US Marine hotute chuan he thil thleng hi pawi an tih thu leh a ram mite an tiralkhel chu pawi an tih thu te, he thil thlen dan hi an chhui chian mek thu an sawi a ni. Puan tawh angin, Okinawa-ah hian US sipai eng emaw zat dah an ni a, Futenma \umhmun bulah sikul, damdawi in leh sumdawnna hmunte a tam avangin, thlawhna tla emaw, chhiatna dang emaw thlen palh an hlauh thu an lo sawi fo tawh \hin a, US sipaiten thil tihsual eng emaw avangin, a ram mite hi an lungawi lo hle tawh a ni.