Japan lal fanu-in hnamchawm tlangval pasalah neih tum

Japan ram lal fanu, Princess Mako-i chuan a ngaihzawng, hnamchawm tlangval, Kei Komuro-a nena an inhual thu a puang a, Komuro-a hi pasalah a neih chuan lal chhungkaw zinga mi a nihna hlihsak nghal a ni ang. Kum 25 mi, Princess Mako-i hian lal, Emperor Akihito-a hnen atangin an inhual thu puan phalna a hmu a, a ngaihzawng nena thuthar lakhawmtute an kawm dunnaah lal fanu hian hnamchawm tlangval, pasala a neih chuan lal chhungkaw mi a nihna hlihsak a ni dawn tih hi a naupan lai atangin a hre tawh niin a sawi. Lal fanu a nih angin an chhungkua leh Japan ram lal chu a theihtawpin pui thin mah se, a mimal nun hlimna chu a ngai pawimawh hmasa ber tih a sawi bawk. Kum 1947-a siam, Japan lal chhungkaw dan hnuaiah Mako-i hi lalthutthleng luah tur zingah a tel lo a ni. Princess Mako-i hi Prince Fumihito, Prince Akishino tia vuah fanu a ni a, museum lam zirnaa mi thiam, Ph D zirlai a ni. Princess Mako leh a pasal hual, Kei Komuro hi kum 25 mi ve ve an ni.