Health Department hnuaia Food & Drugs Administration-in nikum January leh December inkar chhung khan damdawi zawrh phalna Licence 32 an titawp. Hemi chungchanga ZONET zawhna chhangin Food & Drugs Administration Joint Director, Pu Lalsawma Pachuau chuan, damdawi zawrhte hi mihring tan a him tawk em tih an enfiah fo thu a sawi a, nikum chhung khan damdawi chi hrang hrang sample 267 an endik zingah 3 chu Standard Quality tling pha lo an hmuh chhuah thu a sawi. Pu Lalsawma Pachuau chuan, damdawi zawrh phalna licence an tihtawpte hi damdawi ruih theih chi dik lo taka an hralh vang te, an licence huam chin b^k lo zuar leh licence nei lo hnena dik lo taka lo hralh chhawngte niin a sawi a, heng bakah hian licence tihtawp lailawk 2, an thil tih sim tura hriattir zawm lo, a hnua tihtawp a awm tih a sawi bawk. Pu Lalsawma Pachuau chuan, thawktu an indaih lo hle tih sawiin tunah hian Mizoram pum enkawl turin Drugs Inspector 8, Food Safety Officer 2 leh Directorate-a \hu 3, an vaiin 13 chauh an awm niin a sawi a, Mamit tih loh District dang zawngah thawktu dah a ngaih bawk si avangin Aizawl bik chauh vil tur pawhin an indaih lo hle niin a sawi bawk.
