Israel-in nizan khan missile hmangin Syria khawpui, Damascus daia sipai hmunpui a bei niin sorkar media-in a sawi a, he inbeihna thleng avang hian thil a chhe nual a, Israel missile pahnih vel chu Syria sipaiten an kah thlaksak niin a sawi bawk. Israel sipaite chuan hemi chungchangah hian engmah an la sawi lova, UK-a Syrian Observatory for Human Rights chuan Damascus bulah hian thil a puak niin a lo sawi tawh a, hei hi Israel sipaite missile nia an hriat thu a sawi a bawk a, SOHR hotu, Rami Abdel Rahman chuan missile hian ralthuam dah \hatna hmun a tichhia niin a sawi. Puan tawh thin angin, Israel chuan Syria ram \hian, Shia Muslim party leh hel pawl lian, Hezbollah hnena ralthuam thawn tihtawp nan tun hma pawhin ralthuam dah \hatna hmun hi a lo bei tawh \hin a, BBC chuan thla hmasa khan Iran-in Damascas bulah hian sipai hmunpui a sa mek nia sawi chu thudik a ni ngei tih a hai lang tawh a, Israel PM, Benjamin Netanyahu chuan Syria ramah hian Iran sipaite’n hmunpui an neih a remti dawn lo tih a lo sawi tawh a ni.
Chanchin Thar Israel-in Syria missile hmangin bei
