Iraq ah chuan zirtawpni zan apiangin television show danglam tak hmuh tur a awm thin a, he show ah hian Jihadist mi leh sa, tih hlum hmabak te chu lan tir thin an ni.
Mipuiin TV an thlir tam hunlai takin heng thiam loh chantir tawhte hi kawr eng leh serthlum rawngte hak tirin TV hmaah lan tir an ni thin a ni. Iraq hian ISIS te lakah hnehna an chang tawh tih December thla khan a lo puang tawh a. Rawva taka che thin ISIS mi leh sa thahnem tak Iraq hian a hreng mek a ni. Chawlhkar tinin ‘Dan rorelna hnuaiah’ tia vuah TV Programme hi vawi khat tih chhuah thin a ni a, thiam loh chantir tawh ISIS mi leh sa te hi venhimna khauh tak hnuaiah an pawi khawihna hmunah hruaiin, an chet dan pholan thin a ni. He show hi mipui thinlunga ISIS te thlawpna tih bona tura buatsaih a ni tih Show Presenter kum 36 mi Admad Hassan chuan a sawi a, Interior Ministry leh Defence Ministry lam te thurawn anga show hi buatsaih a nih thu a sawi. He TV show hi Iraq sorkar channel, Al Iraqiya ah tih chhuah thin a ni.
