Iran thlawhna tla, mi 66 chuangte thih vek ring

Iran thlawhna tla-a chuang mi 66 te chu an thih vek rin a ni a, khaw awm danin a zir loh avanga nimin tlai lama chhanchhuah hna thawh chawlhsan lailawk anih hnuin vawiin khan chhunzawm leh a ni. Aseman Airlines thlawhna hi Zagors tlang bulah nimin khan a tla a, a chhunga chuang mi 66 te hi an thih vek rin a ni a, thli na tak a tleh zui avang leh vur a sur zui bawk avangin chhanchhuah hna thawktute chuan nimin tlai khan an hna an chawlhsan a, vawiin lamah an thawk chhunzawm leh thei chauh a ni. He thlawhna ATR 72-500 hi Tehran atanga chhim thlang lam Yasuj pana thlawk a ni a, a thlawh chhuah atanga darkar 1 velah a tla a ni. A tlakna lai hi Yasuj atanga km 22 vela hla a ni. Thlawhnaah hian passenger 60 bakah security guard pahnih, flight attendant 2, pilot leh co-pilot te an chuang a ni. Chhanchhuah hna thawktu tlanglawn thiam mi 100 vel ten thlawhna tlakna ah hian dam khaw chhuak an awm em tih an dap mek a ni.