US in Iraq khawpui Baghdad-a thlawhna hmanga a beihnaah General Suleimani leh Iraq paramilitary commander Abu Mahdi al-Muhandis leh midang paruk te an thi a, hei hian Iran leh US inkar bakah Middle East ah boruak a ti \ang hle a ni.
Baghdad-a General Suleimani leh midangte sunna kawng zawhah hian mipuite chuan thawmhnaw dum an inbel a, Hashd al-Shaabi, Popular Mobilisation Forces tia sawi bawk puanzar te an keng a ni. Sunna kawngzawh huaihawttu PMF thupuangtu Mohannad Hussein chuan khawpui laili Hurriya Square thleng kawng hi zawh a ni tih a sawi a, Muhandis-a leh midangte ruang hi Shia khawpui thianghlim Najaf ah kalpui a nih hnuah vui an ni ang a, Soleimani-a ruang chu naktuk Pathianni-a vui turin Iran khawpui Tehran ah thawn a ni ang tih a sawi.
Iran chuan Soleimani sunna hi ni thum chhung neih a nih tur thu a lo puang tawh a, amah hi Iran rama thuneitu sang ber dawttu anga ngaih a ni a, Iran hruaitu lu ber, Supreme Leader Ayatollah Khamenei chuan a thihna chungchangah na taka phuba lak a ni dawn tih a puang a ni.
Vawiina Baghdad-a kawngzawhtute hian Iraq leh PMF te chu US chetna chhanglet tura an duh thu au chhuahpuiin, Iraq ram chhunga US chet dan chu dan kalh a ni an ti. Iraq dinhmun hi a khirhkhan hle a, lehlamah US sipaite hian ISIS te beihlet kawngah Iraq sorkar hi an puih mek laiin, Iran hi Iraq-a Shia kaihhruai sorkar thawhpui nghet tak a ni thung a, US leh Iran te inkara buaina hian Iraq ram chhungah indona thlenin, Iraq chu dinhmun \ha lo leh zuala lut thei dinhmunah a ding mek a ni.
