US chuan Soleimani hian US beih a tum avanga thah a ni tih a sawi a, hemi avanga boruak sosang chho zelah hian US in sipai a tirh luh belhte hian Kuwait-a sipai lo thawn luh tawh mi 750 vel an belhchhah dawn a ni.
Iran in US sipai leh America hmun pawimawhte beih a tum nia a hriat avangin US hian May thla thleng khan Middle East ah hian sipai 14,000 a lo tirhluh belh tawh bawk a, Iran General Qassem Soleimani thah a nih avang hian US leh Iran inkar boruak a \ang zual a, Iran chuan na taka phuba lak a nih tur thu a sawi a ni.
US President Donald Trump-a chuan US sipaiten khawvela mifirfiak hlauhawm ber Qassem Soleimani chu ruahmanna fel tak hnuaiah an that tih chanchinbumite hmaah a puang a, General Soleimani hian US sipaite leh ram palaite beih tumin ruahmanna a siam a ni a ti.
US Secretary of State Mike Pompeo pawhin Soleimani thah a nih danah dan bawhchhiatna a awm lo nia sawiin, US leh US hmun pawimawhte himna tura hmalakna a ni a ti a, General Soleimani hian US beih a tum ngei a, America mi leh mi dang tam tak thihnaa mawhphurtu a ni a ti.
