Iran-in missile siam chhuah kawngah EU inrawlh lo turin ti

Iran sipai pawlpui, Islamic Revolutionary Guard Corps deputy commander, Hossein Salami chuan nimin khan missile siam chhuah kawnga an hnathawhah European Union chu inrawlh lo turin a ti a, missile chungchangah hian France chuan Iran chu biak a duh thu a lo sawi tawh a, US pawhin he thilah hian EU chu inrawlh tur leh, nuclear ralthuam chungchanga inremna palzuta missile a en chhin fo avangin Iran chu hrek turin a ti a, Iran sorkar erawh chuan missile hi a ram ven himna tur nia sawiin, tihtawp mai theih a ni lo tih vawi tam a lo sawi tawh a ni. Iran sorkar media, IRNA sawi danin, Salami chuan EU hi Iran missile chungchangah a inrawlh chuan Europe ramte chu hmelma angin a en ang a, a \ul dan angin a che dawn niin a sawi a, an missile siam chhuah chuan hma a sawn zek a, km 2,000 kap phak missile-te pawh hei aia hla kap thei tura siam theih a ni a, hei hi Europe ram beih nan a hman theih dawn niin a sawi a ni. IRGC hian Iran ramah thuneihna sang tak a nei a, mahse ram pawn lam thil, Foreign Policy erawh a thuhnuaiah a awm lova, hei vang hian IRGC hotute thil sawi hi sorkar ngaihdan anga pawm a ni ngai lova, Iran President, Hassan Rouhani pawhin Foreign Policy chungchanga IRGC thuchhuah siam chu a lo sawisel fo tawh \hin a ni.