Iran sipai pawl, Revolutionary Guard Corps hnuaia sipai rual \ha mia chhal, Quds force hotulu, General Qassem Soleimani thihna avanga thil thleng zui tur zawng zawngah US chuan mawh zawng zawng a phur a ni tih Zarif hian a sawi a, US leh a sangawizawnpui Israel tan nghawng na tak a nei dawn tih a sawi.
General Soleimani thah a nih hnu hian boruak a sosang chak hle a, US chuan Iraq-a US mi leh sa awm te chu chhuahsan thuai turin a hriattir nghal a, Israel sipaite pawh an inring nghal a, Iran in a thawhpui Hezbollah leh Palestinian group Hamas te hmangin emaw Gaza-a Islamic Jihad te kaltlangin emaw a beih mai Israel hian a vengthawng a ni. Israel Defence Minister chuan sipai hotulute Tel Aviv ah a ko khawm nghal a, Prime Minister Benjamin Netanyahu pawhin Greece rama a zin hun tur a pawttawi nghal a ni.
US Democratic congressional hruaitu in President Donald Trump-a’n Soleimani bei tura thu a pe chu a dem thu sawiin, President hian Congress pawmpuina a nei hmasa lo tih a sawi.
House Speaker Nancy Pelosi chuan America ram hruaitute ngaih pawimawh hmasak ber chu America mipuite nunna leh an ham\hatna a ni a, America sipai leh ram palai te nunna derthawnga siam chu a chhan nena bukin a demawm a ni a ti a, Quds force commander qasem Soleimani thah a nih hmain Iran laka sipai chakna hman phalna, Authorization for Use of Military Force (AUMF) a awm lo a, Congress rawn hmasak a ni bawk lo tih a sawi. Democratic party hruaitu dang Adam Schiff pawhin America mipuiten Iran nena indo an duh lo tih twitter ah a ziak bawk.
